إحمى البزنس الخاص بك وقت الأزمات

الكارثة الوبائية اللي اصابت العالم واللي بسببها بلدان اتقفلت، و وسط الأحداث دي كلها الشركات الصغيرة والكبيرة بتحاول تقاوم عشان تكمل في الازمة دي وعلى الرغم من فرض حظر تجول بغرض وقف نمو الفيروس الا ان الشركات الصغيرة بتعافر اكتر عشان تقدر تكمل بالأخص الشركات اللي معندهاش احتياطي نقدي وبنتكلم عن شركات عدد الافراد فيها قليل مش كبير

النهاردة وزي ما موعدناكم في أول الشهر اننا هنتكلم عن إزاي تتعامل مع الكارثة الوبائية دي بطريقة إبداعية ونخرج بره الصندوق عشان تحاول تنجو بشركتك الفترة دي

لو انت صاحب مطعم / كافيه دي بعض الإقتراحات عشان تنجو من الازمة دي على خير

حافظ على نظافة المطعم / كافيه وتعقيمه بالإضافة الى اتباع قواعد السلامة كلها و نشر الاجراءات اللي تم اتباعها على مواقع التواصل الاجتماعي الخاصة بك عشان تطمن عملائك

قلل عدد رواد المكان عشان تحافظ على المسافة بين الاشخاص

انشر الوعي بين عملائك وطمنهم دايما

زود عدد الطيارين اللي عندك ولو مش بتقدم خدمة الديلفري جيه الوقت انك تقدمها بدل ما مطعمك ميبعش خالص يبقى أقل الضرر أفضل

اعمل عروض على خدمة الديلفيري

خليك على تواصل مع عملائك من خلال مواقع التواصل الإجتماعي أكبر مثال : ماكدونالدز و ستاربكس وغيرهم كتير

لو انت صاحب منتجع سياحي دي بعض الإقتراحات عشان تعدي الأزمة دي على خير

الأزمة دي فرصة ترتب أوراقك كويس ولازم تعرف انها مجرد وقت وهتعدي هو اه وقت طويل لكن هي زوبعة وهتعدي وهنا بنحاول نطلع بأقل أقل الخسائر

تقدر الفترة دي تتواصل مع زوارك ومتابعيك من خلال مواقع التواصل الإجتماعي عشان يفضلوا دايماً فاكرينك وتشجعهم انهم يلزموا منازلهم وانهم ينتظروا اقوى العروض بعد انتهاء الازمة وفترة الحظر

ساعد على نشر الوعي بين متابعيك على مواقع التواصل الاجتماعي

انقل مكانك للعالم الإفتراضي عشان دايما متابعيك يكونوا معاك وتبقى اول مكان يكون في بالهم بعد ما تعدي الازمة على خير

الفترة دي فرصة كويسة جدا انك تحط خطط جديدة وبدائل.

لو انت صالون تجميل او Spa دي بعض المقترحات عشان تعدي الأزمة دي على خير

طبعاً وبعد قرار الحظر مبقاش يجي عملاء ودي خسارة مادية كبيرة ولكن دايما خلينا نبص على النص المليان، خليك على مواقع التواصل الإجتماعي وانشر على حساباتك طرق العناية في المنزل و ازاي يحفاظ عملائك على جمالهم خلال فترة الحظر ولحد ما يرجعوا للمكان تاني .

ممكن تبدأ تعمل فيديوهات على اليوتيوب لتسريحات شعر تناسب الحظر ويكون المحتوى المقدم ترفيهي وتعليمي بكده هتحافظ على عملائك وكمان هتجذب عملاء جدد اول لما يترفع الحظر هيزوروا الصالون الخاص بك.

جزء الوعي والتوعية مهم جدا عشان متابعيك على مواقع التواصل الاجتماعي يفضلوا فاكرين انك كنت معاهم وقت الازمة.

لو في جزء من منتجات العناية بالشعر والبشرة والجسم كنتوا بتبيعوه ،ممكن تعرضوه على مواقع التواصل الإجتماعي الخاصة بيكم

المراكز الدراسية / المدرسين الخصوصيون

بعد قرار الغلق دي فكرة لكل مركز بيقدم مادة علمية انه يكون Online وكذلك المدرسين ، الحكومة بدأت بده مع بداية الأزمة فا دلوقتي فرصتك لو معندكش تواجد أون لاين انه تكون متواجد خلال الازمة وكمان بعد الأزمة.

فترة وجود الناس في البيوت هي أفضل فترة لعروض خاصة بالكورسات اللي بتقدمها زي ما مواقع تعليمية كتير عملت كده ومنهم Udemy / Coursera و CEO Business School

محلات الملابس والإكسسورات

المحل فاضي دلوقتي لكن تقدر تعرض كل منتجاتك أون لاين انت عارف ان مبيعات سوق.كوم زادت الفترة دي من 40% لـ 50%

طمن عملائك انك بتعقم حاجتك وتابع مع مندوب التوصيل طرق السلامة والوقاية

انشر بوستات توعية للعملاء بتوعك وخليك معاهم وقت الازمة دي

ده أفضل وقت ليك ادي الأمل لعملائك وان اللي جاي أفضل

طبعاً في قطاعات كتير متأثرة بالأزمة اللي احنا فيها ولكن تم ذكر بعض القطاعات اللي بعتولنا سألونا نتصرف ازاي

انت كمان لو عايز تحمي البزنس الخاص بيك وقت الازمات تقدر تسيب كومنت بالنشاط الخاص بيك وسيتم التواصل معك في أقرب وقت

حط دايماً في بالك من الأزمات تصنع الفرص ورب ضارة نافعة

خليك متابعنا واحنا معاك خطوة بخطوة لحد ما نعدي على خير

#مركزإعدادرواد_الأعمال
#احميالبزنسالخاص_بك
#إصنعمنالأزمة_فرصة

[:ar]